Montag, 2. Mai 2016

De lütten Rummeldulsch het wat toverteln!........ De jong Lüdd



Moin tosamen!

Letzt muss ick up de Bus töwen un as ick dor so stund, heb ick en beten de Lüdd  beoogt un veele van de Jong`n. Dor kanns jo Soken sehn, dat glövst dun jo gaarnich.......Wie de sick antreken do, hat haut di jo bold üm......

Dat fangt jo all an mit de Büx, dat kennt de jo nich mehr, düse enge Schluch muss du jo mit de Knieptang antreken un kanns denn froh wen, wenn du dat looter wer utkriggst......Dat nenn sick dann "Skinny-Jeans" (un nich mehr "Nietenbüx"), de sünd so eng van Aanfang an, dor sünd se nich mit in`t Baadwann ween, so as wi dat noch doan hebt......Wenn se sick dann mol bücken dot, dann kanns allens seh`n , de Büx rutscht övert Mors, dann is de Sicht free up de Morsbacken (un up dat Mors-Tattoo). Rechtens Ünnertüch hebt se jo ock nich mehr, dat sünd jo man all so lüttje Dinger, de se anhebt, nix um Mors to, nur so en dünne Strippen, de Morsbacken sünd nackich, keen Wunner, wenn se sick wat wechhollen dot in Winterdach. Fröhr han wi en richtich Schlüpper an, foken sogor en Wullschlüpper, dat weer moi warm. Ober nich nur de Mors is nackich, ock de Buuk, dat kummt dorvan, wiel se kin Ünnerhemd anteken dot un denn wunnert se sick wenn se sick verkollen dot. Un dat allerslimmste is, wenn de dicken Buuk övert Büx hangt, dat is doch unästhetisch, oder nich? Dat schwabbelt dor all rümm un kiekt ünner de T-Shirt wech, nee, dat ha dat fröhr nich geven, dor wer dat allens verpackt.


Un dann de Schoo, entwedder hebt se sückse kloobich Turnschoo an oder se stelzt up "Highheels" dör de Geegend. Veele könt jo gaarnich dorup loopen, de brekt sick bold de Beene, ober dat schall jo ock nich praktisch ween, sündern good utseh`n. No denn man to......
Sminken dot se sick jo ock, manche seh`n ut, as wenn se in en Farbemmer fallen sünd, regelrecht dichtspachtelt, bi anner dost di richtich verjogen, wie in en "Gruselkabinett". Dor is nix notürlichs mehr an. Welk dot sick jo ock de Hoar farven, wenn Glück hest in "Brigitte Nielsen-Blond" or schwatt as en Gruftie, wenn Pech hest in grön or lilla. Dat wer nix för mi, ick bliev so as ick bün.
Ehr Hannen hebt se jo immer vull, in de en dat Handy un in de anner wat to drinken, entwedder en "Coffee to go" or en "Red Bull" ( ick hoop dat is nu keen Slieckwerbung). Ick hebt dat Tüch noch nie drunken, dat schall smecken as wenn du Gummibeern in`t Schnuut hest.....Na, wer dat denn mach....

De sünd jo ock regelrecht hibbelig, de ganz Tied sünd de mit dat Handy togange, de markt gaarnich, wenn do mit de snacken dost, denn de hebt jo de Stöpsel in`t Ohrn un de Musik so luut, dor kannst rümschreen, dat kummt nich an. Un denn tippt se de ganz Tied "SMS" in dat Handy, dor wast du ganz mall. Un wie flink se dat köönt, dor snallst du aff. Ick kann gaarnich so gau snacken, wie de dat intippen köönt, de hebt seker en Muskelkater in Hannen. We hebt uns noch lütje Zeddel tosteken, vandach kunst du froh ween, wenn se noch en ganzen Satz tosamen kreegt, de kennt jo nur noch "Smilies" ;-), so ne Art Teken-Sprook :-).
Jo, so hebt sick de Tieden ännert, ober as ick jong wen bün, dor hebt min Öllern ock de Hannen övert Kopp tosamenslon, as wi rümlöppen sünd.......So is dat eben......


Nu wünsch ick jo en schöön Dach, mokt dat good.
We sehn uns anner Moandach.

Hol jo hüdelig,
de lütten Rummeldulsch













Teilen